DEHLI, 22-noyabr. /"Dunyo" AA/. O'zbekiston davlat jahon tillari universiteti (O'zDJTU) delegatsiyasi Agra shahridagi Doktor Bhimrao Ambedkar nomidagi universitetda amaliy tashrif bilan bo'ldi, deb xabar bermoqda "Dunyo" AA muxbiri.

Mazkur tashrif mamlakatimiz oliy ta'lim muassasalarining xalqaro aloqalarini mustahkamlash va dunyoning yetakchi o'quv yurtlari bilan akademik hamkorlikni kengaytirish yo'lidagi navbatdagi qadam bo'ldi.

Delegatsiya tarkibiga O'zDJTU professor-o'qituvchilari va talabalari kiritilgani nafaqat ilmiy-akademik, balki talabalar almashinuvining ham muhimligini ta'kidlaydi.

Uchrashuvlar davomida ikki universitet vakillari samarali muzokaralar o'tkazdi. Muhokamalar markazida hamkorlikning qo'shma ilmiy konferensiya va seminarlar uyushtirish, talaba va o'qituvchilar uchun akademik almashinuv dasturlari tashkil etish, birgalikda ta'lim dasturlari ishlab chiqish, xalqaro nashrlarda ilmiy maqolalar chop etish, O'zDJTU talabalarining diplom loyihalariga hindistonlik hamkasblar tomonidan ilmiy rahbarlik qilish va boshqa amaliy yo'nalishlari bo'ldi.

Hindistondagi uchrashuvlar O'zDJTUning ta'lim jarayonini xalqaro talablar darajasiga ko'tarish sohasidagi izchil siyosatini namoyon etdi. Universitet hindistonlik sheriklar bilan talaba va o'qituvchilar uchun yangi imkoniyatlar yaratib, faol va samarali hamkorlikni rivojlantirmoqda.

Bunday aloqalarni rivojlantirish O'zbekiston va Hindiston o'rtasidagi ilmiy-akademik ko'prikni mustahkamlashga va mamlakatimiz oliy ta'lim tizimining jahon akademik makoniga integratsiyalashuviga xizmat qiladi.

Doktor Bhimrao Ambedkar nomidagi universitet (avvalgi Agra universiteti) 1927-yilda tashkil etilgan bo'lib, mamlakatning eng keksa oliy o'quv yurtlaridan biri hisoblanadi. U Hindistonning atoqli siyosat arbobi, Hindiston Konstitutsiyasi muallifi Bhimrao Ambedkar nomi bilan atalgan.